Ostóber er tími til að njóta osta. Gæddu þér á þínum uppáhaldsostum, smakkaðu nýja og prófaðu spennandi uppskriftir þar sem íslenskir ostar koma við sögu.
Spennandi nýjungar
Í ár kynnum við til leiks nokkrar spennandi nýjungar og fyrst ber að nefna Mascarpone með súkkulaðibragði, næstur er sjálfur Óðals Búri í sneiðum og þá koma Eldur og Marmari úr Ostakjallaranum aftur á markað vegna mikillar eftirspurnar. Nú og ef Sveita kúmenostur hefur farið framhjá ykkur er Ostóber án efa mánuðurinn til að gæða sér á honum. Ostarnir eru einstakir með sín sérkenni og því skemmtileg viðbót við aðra íslenska sælkeraosta og njóta sín vel á ostabakka eða einir sér með góðum drykk og meðlæti.
Mascarpone með súkkulaðibragði
Í fyrsta sinn kemur á markað íslenskur mascarpone með súkkulaðibragði en um er að ræða spennandi sérútgáfu sem kemur á markað í tilefni af Ostóber. Það besta er að það eru engar reglur um hvernig á að njóta hans. Mascarpone með súkkulaðibragði er dásamlegur með ferskum ávöxtum og berjum, frábær í kökur, krem og aðra eftirrétti og tilvalinn í bakstur. Svo má auðvitað líka grípa skeið og njóta hans nákvæmlega eins og hann er beint upp úr dósinni – við dæmum engan.
Óðals Búri
Búri er þessi mjúki, góði og rjómakenndi ostur sem lætur ekki mikið fyrir sér fara við fyrstu sýn en þegar fólk kynnist honum verður hann fljótt ómissandi hluti af hversdagsleikanum. Innblásturinn að framleiðslu Búra kemur frá dönskum rjóma-Havarti sem hefur um árabil verið þekktur fyrir fágaða mýkt og ríkulegt bragð.
Eldur með chili
Kröftugur ostur sem sameinar mýkt og mikið bragð. Hann er mildur í grunninn en ber með sér eldheitan keim af chili svo úr verður krydduð upplifun og ævintýri í hverjum bita.
Marmari
Marmari er tvílitur og töfrandi cheddar ostur sem setur skemmtilegan svip á ostafjölskylduna. Marmari er þéttur í sér, kornóttur, eilítið þurr í munni en mildur á bragðið með vott af beikon- og kryddjurtarbragði, fullkominn í matargerð.
Sveita kúmenostur
Kúmenostur hefur verið vinsæll meðal Íslendinga um áratugaskeið og skipað sérstakan sess í matarhefðum þjóðarinnar. Nú er loksins kominn Sveita kúmenostur sem sameinar gamla hefð, gæði og einstaka bragðupplifun, mörgum ostaunnendum til mikillar ánægju.
